Ouro de Galicia

Os grandes días teñen un nome e una data. O deportivismo lembrará o 25 de xullo de 2002 como o día en que foi galardoado co premio máis importante da comunidade, a Medalla de Duro de Galicia. Este recoñecemento, o primeiro que recibe un clube de fútbol, premia "o servicio a prol do pobo galego" e a "brillante traxectoria" da entidade.

A carón do Apóstolo Santiago e no seu día grande, que é o de Galicia, o presidente deportivista Augusto César Lendoiro recolleu a Medalla de Ouro de mans do titular da Xunta, Manuel Fraga. Despois de recibir a maior ovación da noite, o dirixente coruñés subiu á tribuna de oradores para agradece-la condecoración e expresa-lo sentir xeneral dos outros galardoados. "Esta relucente medalla, que tanta significación ten para avivar o espíritu e enriquecer as ilusións, fai medrar noso compromiso cotiá. Procuraremos sempre estar á altura da xenerosidade de Galicia", manifestou César Lendoiro.

Pola súa banda, Manuel Fraga agradeceu ó Deportivo os éxitos colleitados nos últimos anos e animou ó deportivismo a camiñar neste vieiro no futuro. 0 presidente do goberno galego resaltou a importancia dos títulos deportivistas ó tempo que lembrou a orixe modesta do clube coruñés.
Tras calificar a Augusto César Lendoiro como "o mellor presidente dunha entidade que tivo moitos presidentes de categoría", Manuel Fraga demostrou que coñece ben a traxectoria branquiazul o repasar as principais figuras futbolísticas da case centenaria historia branquiazul. É máis, o presidente da Xunta admitiu que eses nomes lexendarios, dende Chacho ou Acuña, fanlle revivir "os alegres anos da mocidade".