A estrea está prevista para febreiro de 2004, case con toda probabilidade no Festival de Berlín, un dos máis prestixiosos do mundo. O reparto contará con intérpretes alemáns, franceses, ingleses, turcos, galegos e lusos. Por parte galega, o protagonista será Miguel de Lira, o mítico Currás, ó que tocaralle facer de sarxento nunha final na que non se sabe quen gaña e quen perde. A amizade de Currás con Stöhr dende a etapa compostelá do xermano foi unha das claves para evitar a presión doutras productoras, algunhas catalanas, que pretendían que a final fronte o Galatasaray fose xogada por outro equipo, como o Barcelona. Non faltarán na película secuencias da Coruña e afeccionados branquiazuis.
Pola súa banda, O Trasto estrouse en Santiago de Compostela o 12 de xuño. Trátase dun dos tres curtos da productora galega Lorelei Producciones, que contou coa axuda da Consellería de Cultura, Comunicación Social e Turismo da Xunta de Galicia. “Un ancián pasa o día diante do televisor que o fillo e a nora lle puxeron diante. O avó non é para eles máis que un trasto, o mesmo que a televisión que tanto odia. Cun tono de humor negro e personaxes estereotipados, O Trasto reflexa a incomunicación, o abandono e a soidade do avó. O punto forte da historia transcorre o día no que o Deportivo da Coruña gaña o campionato de Liga”, sinala Xosé Zapata, un dos responsables de Lorelei Producciones. Rafael Calvo é o director deste curto galego.